Uda heldu da, eta harekin batera sanferminak eta herrietako jaiak ere bai. Eraikizetik badakigu jai giroko testuinguruetan erasoak areagotu egiten direla, eta gehienetan gizonen aldetik emakumeen eta bestelako identitate disidenteen aurka gertatzen direla.

Horregatik, mugimendu feministak eta LGTBIQ+ mugimenduak proposatutako mobilizazioetan parte hartzera gizonak gonbidatu eta animatzeaz gain, jai eta parranda giroko espazioak okupatzeko dugun moduari buruz gizonoi zuzenean hitz egin nahi digun kanpaina bat jarri dugu martxan.

Ausarkeria (edo matxirulismoa) areagotzen den testuinguruetan, beharrezkoa da mezu labur eta zuzenen bidez besteen gainetik nahi dutena egiten duten gizonei interpelazioa egitea; era berean, gai honen inguruan gizonek dugun erantzukizun indibidual eta kolektiboari buruzko eztabaida sustatu nahi dugu. Izan ere, bai, ez dira gizon guztiak; baina beti gizonak!

Horretarako, lau hizkuntzatan egindako hiru kartel diseinatu ditugu, Iruñeko hainbat gunetan jarriko direnak.

Lehenengoak, "Gizona: ez eraso" lelopean, irakurlearengan eragina sortu nahi du, eta gizonok intentsitate desberdinetako erasoak erreproduzitzerakoan dugun erantzukizun indibiduala azpimarratu.

Bigarrenak, "Gizona: zure laguna lizuna bada, zer egingo duzu?", gure lagun lizunen jokabideen aurrean ardura hartzera eta beste aldera ez begiratzera bultzatu nahi gaitu, gure inguruan gertatzen diren erasoen aurrean dugun erantzukizun kolektiboa gogoraraziz.

Eta azkenik, "Gizona: zenbat espazio hartzen duzu?" lelodun kartelak urrats bat harago joan nahi du, gizonok jai giroko espazioak nola erabiltzen ditugun hausnar dezagun: tabernetan nola mugitzen garen, zenbat bultzatzen dugun, zenbat oihukatzen dugun... Azken batean, gure ondoan dauden pertsonak zenbat gogaitzen ditugun, hori egiteko eskubidea dugula sineste hutsagatik.

Testu sinpleak dira, baina zuzenak eta argiak direla uste dugu, eta gizonon jarreren erantzukizunari eta aldaketaren beharrari zuzenean heltzen diete.

Amaitzeko, aipatu nahi dugu kanpaina hau Nafarroako herri eta auzo guztietara iristea gustatuko litzaigukeela, baina gure jarduteko gaitasuna mugatua da. Horregatik, kartelak formatu digitalean jartzen ditugu eskuragarri, nahi duenak inprimatu eta bere herrian edo auzoan jar ditzan. Honako helbide elektroniko honetan eska ditzakezue: [email protected]

Abusu eta erasoetatik libre izango diren jai batzuen alde, denontzat!